तीन पावलां गोंयचीं (कोकणी कविता )
"तीन पावलां गोंयचीं"
गोंयच्या दानवानों सादूर जायात
तीन पावलां दान घेवंक,
बटू वामनाचें रूपणें घालून
पूर्वे सावन देव येतात..!!
दानव खरें पुण दयावान तुमीं,
आपोवणें धाडून घरां दितले तुमीं.
माड-माडयो चडूंक शिकयतले तुमीं,
शेवटाक कपलार हात मारतले तुमीं...!!
आवयचो भरयल्लो घास विसरतले तूमीं,
डोंगर-दरी सपाट करतले तुमीं.
प्राणवायु विकूंक बाजार उबारतले तुमीं.
कित्याक तर,पुर्वे सावन दान घेवंक देव येतात...!!
झाडां-पेडां कातरतले तुमीं,
आवयच्या आंगार कातरे धालतले तुमीं.
सवण्यांक-पाखरांक शिस्त लायतले तुमीं,
सोरपांक-वागांक एकाच पांजऱ्यान दवरतले तुमीं.
गोंयचे सप्तऋषी दरबारांत बसल्यात,
गांव-वाठार जोकूंक लागल्यात.
संजिवनिचो तिरस्कार करुंक लागल्यात,
कित्याक तर, पूर्वे सावन दान घेवंक देव येतात...!!
शिमा - शिमानीं चाळे धाडटले तुमीं,
ताशे - घुमटां फोडटले तुमीं.
रोमटां - मेळ विसरतले तुमीं,
कित्याक तर, पूर्वे सावन दान घेवंक देव येतात...!!
सैमाक कॅमे-यांत सजोवन दवरात,
न्हंयो पिळटात तांचे फोटे काडून दवरात.
वागा - कोल्यां काणयो बरोवन दवरात,
कित्याक तर, पुर्वै सावन दान घेवंक देव येतात...!!
सर्गांतलो देव आपकां मेळत काय...?
दोंगर - न्हंयची राखण करीत काय...?
घायाळ आवयचेर संजिवनी शिपडायत काय...?
कित्याक तर, पूर्वे सावन दान घेवंक देव येतात... !!
पूर्वे सावन देव येतले,
पयलें पावल तुमच्या धरतरेर दवरतले.
दुसऱ्या पावलान संस्कृताय गुटलायतले,
उरलां तिसरें पावल,
तुमीच सांगात खंय दवरतले...?
कवी: नरसिंह र. मातोंडकर.
(शिवदास)
मडगांव - गोंय.
Comments
Post a Comment