म्हाका प्रश्न पडटा ...!!(कोकणी कविता)
म्हाका प्रश्न पडटा...!!
जैत रे जैत करया,
घरां- दारां पेटोवया.
रगता व्हाळ व्हावोवया,
"पूण" कोणा खातीर जैत हें..?
म्हाका प्रश्न पडटा ...!!
मनीसपणाक घाण पडल्या,
रगता-रगतान विचार कुसला.
आंगा कात्र्यानीं किडे रूजल्यात,
धर्म संसर्ग केन्ना सोपत काय...?
म्हाका प्रश्न पडटा ...!!
इल्लें-माणकुलें गोंय आमचें,
राजवटी इतिहासान सजयिल्लें.
शेजारी-आमिगानी दाट्ट भरिल्लें,
शिस्त-कायद्यातलें, काय लुटून व्हेल्लें..?
म्हाका प्रश्न पडटा ...!!
विचारांच्या भोवऱ्यान मन म्हजें गुरफट्टा,
हाँसत-खेळत व्होड जाल्ले "करीम-कामिल,"
जेन्ना म्हाका तिरश्या नदरेन पळयता.
आई लो मार शेजारी माय म्हजी अडायता,
हळूच व्हरून लीपयता.
म्हणून म्हाका प्रश्न पडटा ...!!
राजवटी आयल्यो राजवटी गेल्यो,
फातर सगळे हांगाच उरलें .
फातराचें आकार मात बदल्लें ,
तेन्नां धर्मांचे आयज धंदे करप खरें काय..?
म्हाका प्रश्न पडटा ...!!
कोण म्हण्टा बाटयले तर कोण म्हण्टा बाटले,
उतरां मेळांचो खीणां-खीण अर्थ बदलता.
बाटले तांका तोड ना, बटयले म्हणू शकना.
बाटयले तर आमी शाश्वत वर्ग कशे उरले...?
म्हाका प्रश्न पडटा ...!!
ख्रिस्ताक जुदासान दाखोवन दिलो,
म्हूण ख्रिस्ती धर्म जल्माक आयलो,
आमच्यातलोच कोण शकुनी जावन,
केसान गोळो कापलो काय...?
म्हाका प्रश्न पडटा ...!!
सोबीत इतिहास कुशिक सारून,
विखारी पानाच चाळुया काय...?
बरें-वायटाची समज आसुनूंय,
माकडा खेळ नाचुया काय...?
म्हाका प्रश्न पडटा ....!!
कवी: नरसिंह र.मातोंडकर.(शिवदास)
मडगांव- गोंय.
Comments
Post a Comment